Saturday, October 30, 2010

ಅಹವಾಲು






ಮುಚ್ಚಿದ ಕಂಗಳ ತುಂಬಾ ಕನಸುಗಳದೇ ಬಿಂಬ
ಜೋಡಿಸಿದ ಕೈಗಳೊಳಗೆ ಬೇಡಿಕೆಗಳ ಪಟ್ಟಿ!
ಮನದಲ್ಲಿ ಮೊಳಗುತಿರಲು ನಿನ್ನದೇ ನಾಮಾಮೃತ
ದೇಹ ಹಿಡಿಯಾಗಿದೆ ಭಕ್ತಿ ಭಾವದಲ್ಲಿ.



ಶೃದ್ದೆ, ಭಕ್ತಿಗಳಿಲ್ಲಿ ಮೇಳೈಸಿ ಮೆರೆಯುತಿದೆ
ನಂಬಿಕೆಯಲ್ಲಷ್ಟೇ ಕೊಂಚ ಕೊರತೆ!
ಈಗೇನಿದ್ದರೂ ಪೂಜಾರ್ಚನೆಯ ಮುಂಗಡ ಪಾವತಿಯಷ್ಟೇ
ಕಾರ್ಯ ಕೈಗೂಡಿದಾಗ ತೀರಿಸುವರಂತೆ ಹರಕೆ!



ತಪ್ಪು ಅವರದಲ್ಲ ಬಿಡು ನಿನ್ನದೇ ಭಕ್ತರು
ನಿನ್ನಂತೆಯೇ ಲೆಕ್ಕಾಚಾರದಲ್ಲಿ ಬಹಳ ಪಕ್ಕ,
ಕರ್ಮಫಲ ಕುರಿತಾಗಿ ನೀ ಕಟ್ಟುನಿಟ್ಟಿದ್ದಂತೆ
ಹರಕೆ ತೀರಿಸುವುದರಲ್ಲಿ ಅವರಿರುವುದು ತಪ್ಪಾ?



ಸರಿಸಿ ಬಿಟ್ಟು ಪಕ್ಕಕ್ಕೀ ಲೆಕ್ಕಾಚಾರಗಳನೆಲ್ಲ
ಹರಸಲಾಗದೆ ನೀನಿವರನು ಈ ಕ್ಷಣದಲಿ...
ಹೂ ಉದುರಿಸಿದರೂ ಸೈ, ಗಂಟೆ ಮೊಳಗಿಸಿದರೂ ಸೈ
ಹಗುರಾದೀತು ಜೀವ ಧನ್ಯ ಭಾವದಲ್ಲಿ!